Vídeo de Dani Rodríguez, feito especialmente para http://webboiro.com co apoio de Alén Pérez Maneiro e o citado Dani Gestoso, así como coa axuda de Carlos Vilas e Sara Hermo.
Non se descartan novos traballos de Dani Rodríguez para webboiro.com, pois colabora tamén con DesdePobra.com, onde fixo o vídeo do Carme dos Pincheiros:
Os integrantes de Webboiro agradecen este traballo, que louvan e califican como "excelente". Dani Rodríguez é o webmaster de www.oquepasadiaadia.com
Boiro, 31 de agosto de 2011. A comisión de Festas de Abanqueiro voltou dar exemplo e gabeou un banzo máis para acadar unhas festas do Carme moi completas.Este sábado, 3 de setembro, haberá mexilloada e pinchos todo o día. Pola tarde, inchables para os nenos mentres un grupo de mulleres e homes farán unha capela floral no peirao, na cal se oficiará a misa do Carme do Domingo. Xa pola noite, as orquestras que animarán a verbena a partires das 22:00 horas son o Trío Cibeles de Vigo e un conxunto de rapaces dun grupo local que está comezando.
O domingo, 4 de setembro, é o Día do Carme en Abanqueiro. Ás 10:45 baixarán santos en procesión ata o peirao co grupo de gaitas "A Buxaina". De seguido haberá misa cantada no peirao do Bodión e dará o remate unha procesión marítima coa súa correspondente ofrenda floral polos defuntiños do mar. Á volta vaise recibir á Virxe cunha gran tirada de foguetes mentres anima A Buxaina coas súas gaitas.Dende as 12:30 haberá mexilloada, churrascada e unha paella farturenta no peirao do Bodión. Ademais, este ano contan cunhas empanadas de categoría, feitas para o Día do Carme por un restaurante local.
A verbena do domingo vai ser amenizada polo trío V3 e sobre as 11:45 haberá unha boa tirada de fogos de artificio acuáticos dende unha plataforma fondeada no mar á que contribuíron Otero e Losada así como o asteleiro de bateas de Manuel Sánchez.
A comisión agradece a veciñas, veciños, negocios e empresas que contribuíron economicamente a que estas festas puideran saír adiante.
Cacheira de porco a enterrar. Foto de Diego RomeroBoiro, 10 de marzo de 2011. O Enterro do Óso celébrase este domingo, día 13 de marzo, na parroquia de Abanqueiro. É unha tradición única en Galicia, que consiste no enterro da cachola dun porco e un óso na propiedade da última persoa da aldea que deixou a solteiría. A xornada promete ser longa e repleta de actividades para entreter ao público asistente. Pola mañá, ás doce do mediodía, haberá unha "matraquillada", que non é outra cousa que unha procesión de pequenos tractores (desde "pasqualíns" ata outros modelos pequenos pero agrariamente potentes). Cada matraquillo irá locindo elementos do Entroido -en Boiro dise Antroido- e circulará polos lugares máis representativos de Abanqueiro co obxectivo de chamar a todos ao funeral festeiro e animalos a ensarillarse no mesmo.
A matraquillada é unha procesión de tractores pequenos con adobíos choqueiros Pola tarde, ás catro e media, xa sae a "comitiva fúnebre" ata a "casa do defunto", pois este enterro simbólico partilla os mesmos elementos simbólicos que os habituais, ou sexa: un cura, ataúde, viúvas ao pé, choronas, oracións e sermón. Todos eles cheos de sátira dirixida á actualidade e con adaptación ao Antroido. Hai que enterrar o óso e a cabeza do porco e a parella que se casou por último na parroquia debe ofrecer bebida e comida típica de Entroido a todo aquel veciño que acuda á súa casa.
O resto da tarde haberá unha charanga animadora e, para rematar, sobre as oito e media, á noitiña, este ano darán un concerto os de La Banda de Balbina, gañadores de A Polo Ghit do ano 2009.
Máis dun século de tradición
O Enterro do Óso é unha tradición que ten máis dun século de vida, sempre promovida e organizada por veciños de Abanqueiro sen ningún tipo de asociación ou entidade que se faga cargo dos festexos. Por estas bisbarras hai outros enterros, como o do Felipiño en Porto do Son ou Ribeiro, ou o do Toribiño en Rianxo, así como o tradicional e tan estendido da Sardiña, pero Enterro do Óso só hai en Abanqueiro.
Segundo contan os vellos de Abanqueiro, -non hai documento que o acredite, é tradición oral- a única razón de que se enterre un óso e a cacheira do porco é que "cando te casas comes a carne e deixas o óso".
O edil de Cultura de Boiro e o presidente de Borobó presentan a esquela deste ano Nestes últimos anos, a persoa que máis pulo lle deu a esta iniciativa foi Pepe Vila, pero desta volta a asociación cultural Borobó tamén ofreceu o seu apoio na organización, xa que moitos integrantes deste colectivo, comezando polo seu presidente, Jorge Campaña, son naturais de Abanqueiro.
Queres ver fotos de 2010? Webboiro.com xa as colgou, mira
Fotos do ano pasado tomadas por Diego Romero
O enterro do óso é unha tradición que se ven celebrando na parroquia de Abanqueiro (Boiro) dende hai máis de cen anos. Consiste nunha especie de acto funerario con moita retranca durante o cal se procede ao enterramento dunha cacheira de porco na horta do último que se casou en Abanqueiro. Con este enterramento faise unha festa con filloas, orellas e viño. O gasto corre a cargo do homenaxeado/a.
Neste ano hai un triple enterro. Por unha banda, Toño e a Silvia, recén casados. Tamén homenaxearán a José Blanco (“Cocó”) e a Lucita. E, por último, a Manolo (“o Panchiño”) e a Maruja, que neste ano 2010 celebran as súas vodas de ouro.
Esta celebración terá lugar o próximo domingo día 21. A partires das doce da mañá haberá a tradicional procesión de matraquillos e, ás catro da tarde procederase ao enterramento da cacheira de porco en cada unha das casas dos homenaxeados este ano.
Para a celebración deste día contarán cunha boa comida con churrasco, orellas e filloas que estarán acompañadas de refrescos e un bo viño para os máis grandes. Asemade, os máis pequenos poderán desfrutar dalgúns inchables.
Esta iniciativa está promovida, dende hai varios anos, por algunha da xente nova de Abanqueiro encabezada por Pepe Vidal.
Comentarios [2]