Ribeira, 28 de outubro de 2011. O pasado mércores, 26 de outubro, tivo lugar unha xuntanza no IES Leliadoura, convocada por profesorado do centro, que congregou arredor de 150 persoas entre profesores, pais e nais, para informar e debater sobre as carencias e problemas deste curso 2011-2012 (máis alumnado e máis grupos, profesorado que non medra na mesma proporción, recorte no profesorado de apoio,etc.), por causa dos recortes levados á cabo pola Consellería de Educación e as novas funcións impostas ao profesorado (gardas de transporte), medidas que, en xeral, diminúen a atención individualizada ao alumnado, limitan o tempo do profesorado para a organización de actividades, apertura da biblioteca, prácticas de laboratorio, etc. e, en definitiva, reducen a calidade do ensino público.
Na reunión, coa intervención de profesorado, pais e nais, tratáronse estes temas, informouse das consecuencias que terán estas medidas, afectando principalmente ao alumnado, o máis prexudicado, e decidíronse posibles medidas de protesta e vías de actuación conxunta.
SECCIÓNS BILINGÜES
No que atinxe á formación que ofrece este centro, por segundo curso consecutivo o IES Leliadoura é o único instituto do Concello que conta con 3 seccións bilingües nas ensinanzas secundarias. Hai que lembrar que as mesmas véñense desenvolvendo en 3º e 4º de ESO na materia de Ciencias Sociais – Xeografía e Historia, e en 1º de Bacharelato na materia de Historia do Mundo Contemporáneo. Son polo tanto os departamentos de Xeografía e Historia e Inglés os que veñen colaborando, co apoio do resto do claustro, para levar adiante esta iniciativa. Logo dos comezos da andaina no curso pasado, o profesorado implicado non dúbida en cualificar o programa como un éxito, xa que se pasou de ter 48 alumnos matriculados en bilingüe o anterior curso a un total de 67 este ano, é dicir un 43 % máis de alumnado, e con previsións de seguir aumentando o próximo curso, xa que foron varios os alumnos que aínda non participando agora, xa se mostraron interesados na iniciativa. Dentro do programa son moitas as actividades programadas. Entre elas podemos cabe salientar: proxección de películas en Versión Orixinal, con subtítulos en inglés, realización de traballos en soporte informático, actividades interactivas colgadas na rede, audios e vídeos en lingua inglesa... pero sen dúbida as máis atraentes son a viaxe a Londres a finais do mes de marzo (con visitas aos principais museos e lugares da capital británica e excursións dun día a Oxford) e a presenza no centro dun auxiliar de conversa. Este curso o auxiliar provén dos Estados Unidos, en concreto do estado de Arizona, e axudará ao alumnado na mellora do manexo oral en inglés, pero tamén na aprendizaxe de contidos sobre a cultura e historia do seu país e na realización de traballos en soporte audiovisual. Outra das actividades do alumnado é a de intercambio de correspondencia cun centro educativo de New York.ACTIVIDADES DO SAMAÍN E MAGOSTO
A Vicedirección do IES Leliadoura e mailo equipo da Biblioteca tamén aproveitan para informar dasactividades previstas neste centro educativo para a celebración do Samaín e mailo magosto. Estas actividades veñen desenvolvéndose desde a semana pasada, pero terán o seu cumio a vindeira semana, unha vez que retornen ás clases trala celebración do Día do Ensino e a festividade do 1 de novembro. A semana pasada houbo unha convocatoria bastante novidosa: o certame de SMS de medo, no cal os alumnos podían enviar ao correo electrónico da biblioteca do centro unha mensaxe curta relacionada co terror destes días (do Samaín, non da crise ou da morte de Gadaffi). Pero será entre o 2 e o 4 de novembro cando teña lugar o conxunto central das actividades. Cine de medoO día 2 comeza o ciclo de “Cine de medo” coa proxección da película “Pesadelo antes do Nadal” para o alumnado de 1º de ESO. Ese mesmo día os alumnos de 2º de ESO verán a longametraxe de animación “Os mundos de Coraline”. O ciclo de proxección continuará o xoves 3 coas clásicos “O mociñoFrankestein”, dirixida por Mel Brooks e “Arsénico por compaixón” de Frank Capra, para 3º e 4º de ESO respectivamente. Finalmente, o venres día 4 darase remate coa asistencia dos alumnos de 1º de Bacharelato a “O sexto sentido” e de 2º curso a “Psicose”. Todas as películas proxectaranse na biblioteca e na aula de audiovisuais. Xogos populares, magosto e chocolatePero non todo se vai reducir ao cine. O mércores pola tarde terá lugar unha competición de xogos populares, como carreiras de sacos, tiro da corda, rá, chave, carreira de aros, etc. Antes de acabar entregaranse os premios aos gañadores do concurso “SMS de medo”. Para rematar a tarde todo o alumnado de ESO e Bacharelato poderá degustar as castañas do magosto e acompañalas dun bo chocolate quente.
Antes, en Certo:
Facebook: 
Vitaminas para o galego: 
Comentarios [0]