Ribeira, 16 de abril de 2012.- O salón de plenos do Consistorio deu cabida esta mañá a unha reunión técnica co obxectivo de presentar por parte do Executivo local o proxecto do Novo Mercado de Ribeira aos praceiros e praceiras da cidade. Asistiron unha vintena destes operadores, que escoitaron de boca do alcalde Manuel Ruiz Rivas e do concelleiro de Consumo Vicente Mariño de Bricio os detalles da nova infraestrutura, cuxa construción está programada para iniciarse en agosto.

En resposta a unha suxestión plantexada polas 6 froiterías e carnicerías ata hai pouco instaladas na primeira planta do que era a praza de abastos, o Concello comprometeuse a estudar a posibilidade de que todos os profesionais que operan actualmente no Mercado Provisional poidan situarse no mesmo andar: concretamente, na planta baixa, espazo que está destinado a albergar entre outros 28 postos de mariscos e peixe fresco.

Plan de comercialización

O alcalde manifestou que polo que a el respecta non ve impedimento a esta posibilidade, pero que o que definirá a distribución concreta do inmoble vai ser un plan de comercialización que ten intención de encargar o Executivo. Este traballo terá o obxectivo de acadar a mellor fórmula posible cara un óptimo funcionamento do inmoble en todo o seu conxunto, xa que hai que ter en conta que entre a planta baixa e o primeiro andar se dará cabida a un total de 49 postos de venta de mariscos e pescados, conxelados, froitas, verduras, carnes e outros produtos complementarios como restauración, quiosco de prensa...; a segunda planta aloxará produtos non perecedoiros, mentres que a terceira planta e a terraza superior do edificio acollerán un restaurante.

Así, Ruiz Rivas considerou fundamental que unhas plantas se axuden a outras no reto de que o Novo Mercado sexa un referente económico do municipio e un dinamizador do entorno.

Outra das cuestións abordadas na reunión de hoxe foi o do Mercado Provisional aberto o pasado 3 de abril que, ao parecer dos praceiros, está tendo un funcionamento moi positivo, rexistrándose un sensible incremento de ventas con respecta a antiga praza.

Antes, en Certo:

Mercado: abre o provisional. É tempo dun novo faraónico?

Ribeira: comezou "Encanínate", con 26 persoas que lle aprenderon aos seus cans técnicas para mellorar o comportamento is.gd/BbqBGM

— Certo (@Certo) April 16, 2012

Ribeira: están a amañar o camiño entre A Ameixida e O Touro is.gd/hgmYyR

— Certo (@Certo) April 16, 2012

•  En agosto comezará a construción dun vangardista mercado que custará 3,5 millóns de euros e asemellarase a un barco de cristal
• Xa hai opinións sobre a inoportunidade de adicar fondos europeos a estas obras fastuosas en plena crise namentres se fan recortes no cerne do estado do benestar
  (download)
  

  

  Click here to download:

  Ribeira_aberto_o_mercado_provi.zip (4.71 MB)
  

 Ribeira, 4 de abril de 2012.- Despois de 40 anos, o mercado municipal de Ribeira xa é historia. O alcalde Manuel Ruiz e a directora xeral de Comercio protagonizaron este martes 3 de abril a primeira hora da mañá un acto simbólico co que se pretendeu ilustrar o inicio de derrubo deste inmoble, retirando coa asistencia dun operario de Oviga o letreiro do mercado que dende antano preside a fachada dianteira da edificación.

A continuación chegou o turno de inaugurar oficialmente o mercado provisional situado a escasos metros, na confluencia da rúa Canarias coa rúa Galicia. Esta vez, Ruiz Rivas e Castro Domínguez estiveron acompañados da praceira máis antiga á hora destapar o cartel anunciador co que se dá a benvida aos potenciais consumidores. Sen maior demora abríronse as portas da instalación temporal, onde xa estaban preparados nos seus respectivos postos e engalanados cos seus novos uniformes regulamentarios os vendedores e vendedoras que, unha vez bendita a carpa polo párroco Cesáreo Canabal, atenderon xa aos primeiros clientes.

Nava Castro, Manuel Ruiz, o alcalde de Cambados Luis Aragunde, membros da Corporación Municipal, Magdalena Bringas en calidade de presidenta da principal asociación de consumidores e usuarios do municipio (Amas de Casa), medios de comunicación, técnicos municipais e moitos veciños percorreron nestes primeiros momentos o interior da carpa de 450 metros cadrados na que unha vintena de operadores atenderán ao público, como mínimo, durante o próximo ano e medio.

Pero os actos de hoxe non remataban aí, senón que as autoridades desprazáronse ata o salón de sesións da Casa Consistorial para presentar o proxecto do novo mercado. Cun orzamento de 3,5 millóns de euros, está previsto licitar a actuación de inmediato, de tal xeito que no mes de agosto se poda comezar a construción física do inmoble, cuxa data de finalización é decembro de 2013. Manuel Ruiz destacou o interese recibido das empresas máis importantes de España en postularse para acometer esta obra, o que da idea da envergadura e ambición dun proxecto “que vai marcar un antes e un despois na estética do que ten que ser a nosa fachada marítima”.

Sobre os detalles do mesmo, cómpre resaltar que a estrutura do inmoble simula “un barco de cristal”, en palabras do seu arquitecto Celso López Martín. A instalación estará distribuída en planta soto (para labores de carga e descarga, cámaras frigoríficas, vestiarios, etc...), planta baixa (área de pescados e mariscos), planta primeira (para outros produtos perecedoiros como carnes, froitas, verduras, etc...), segunda (produtos non perecedoiros) e terceira (restaurante). Enriba de todo haberá unha terraza que prestará servizo ao local de hostalería. A edificación estará preparada para conectar chegado o caso cun aparcamento subterráneo: un proxecto este último que está en estudo de viabilidade.

Peixes serigrafiados

Unha das características que máis chamará a atención do futuro e vangardista mercado será a súa fachada de cristal inclinada, que en función da hora do día irá cambiando os tonos e sensacións e estará serigrafiada precisamente con tramas do que é o seu produto estrela: o peixe.

Manuel Ruiz afirmou que para chegar ata aquí houbo detrás o traballo de moita xente e resaltou en primeiro lugar o labor da anterior Corporación Municipal, que ideou o proxecto Riveira Atlántica que permitiu conseguir os fondos europeos Feder. Tamén salientou o traballo desenvolvido por persoal municipal, o dos arquitectos Ángel Cid (redactor do proxecto de derrubo) e Celso López Martín (redactor dos proxectos da carpa e do novo mercado), así como da empresa Oviga, encargada tanto da demolición do mercado como do traballo contrarreloxo de acondicionar a carpa que alberga o mercado provisional.

Mal momento para obras faraónicas

Xa chegaron a esta redacción as primeiras opinións sobre o novo mercado, relativas sobre todo ao enorme orzamento que supón nestes momentos de crise económica. Namentres hai uns anos ninguén daba un chío contra este tipo de obras, e todos os alcaldes galegos competían a ver "quen a tiña máis grande" (a obra pública), agora non están as cousas para fachendear coa que está caendo neste país. Mariano Rajoy, que por fin chegou á presidencia deste país hai escasos cen días, xa advertiu aos seus alcaldes -Ruiz Rivas é un deles- de que "non é tempo para autopistas ou estadios", mais os fondos europeos, como é este caso, seguen apalabrados para estas obras, pode que, senón innecesarias, si prescindibles polo de agora. "Se poden aguantar as nucleares 10 anos máis co perigosas que son, o mercado tamén podía aguantalos", explicaron varios ribeirenses críticos co xeito de planear as obras nesta cidade. O mesmo comentan da futura lonxa: "van facela xusto cando nos están a sacar cotas por todos lados: pensan vender alí o da acuicultura?", din algúns mariñeiros, que cren que habería que reorientar este tipo de gastos neste tempo.

• A carpa vai ser colocada en febreiro na Praza de España e o traslado dos praceiros sería en marzo, en datas aproximadas
• O Concello tamén informou da reunión sobre Educación no Eixo Atlántico que vai ter lugar mañá, 25 de xaneiro, e do peche, por derradeira ocasión, da rúa Cristóbal Colón dende hoxe martes 24

Ribeira, 22 de xaneiro de 2012.- O salón de sesións da Casa Consistorial de Riveira acolleu onte unha reunión entre o concelleiro de Consumo, Vicente Mariño de Bricio, e os vendedores que operan na praza de abastos, para poñer en coñecemento dos mesmos diferentes aspectos relacionados co seu próximo traslado temporal a unha carpa e proceder coa construción do novo mercado municipal.

A este respecto, Mariño de Bricio informou aos praceiros de que xa foi adxudicada con carácter provisional tanto a adquisición da carpa (está prevista a súa instalación en febreiro) como o derrubo do mercado actual. Así e logo, salvo causa imprevista, manteríase mediados de marzo como data para o traslado dos praceiros, unha vez se proceda coa instalación da carpa e o acondicionamento do seu interior.

Suxiren a constitución en asociación

Outro dos puntos máis relevantes da reunión foi a proposta realizada polo edil de Consumo aos operarios do mercado para que se constitúan nunha asociación, ao entender que este sería o órgano máis adecuado para servir de interlocutor entre os praceiros coas administracións, outras entidades públicas e privadas e a sociedade en xeral. 

Vicente Mariño estivo acompañado dun técnico municipal especialista neste tipo de cuestións (Mario Vidal, da Área de Xuventude), quen lles explicou as vantaxes do asociacionismo e os trámites necesarios para constituírse en asociación. A proposta foi moi ben acollida polos praceiros presentes e non se descarta que en pouco tempo quede formalizada a súa creación. 

Outros aspectos nos que se incidiu durante a xuntanza tiveron que ver coa sinalética da carpa (tanto dentro como nas súas inmediacións), o uso de dispositivos para a compra con tarxeta ou o emprego de uniforme polos vendedores. A este último respecto incluso se chegou a presentar unha proposta de uniforme que recibiu o visto bo dos vendedores.

Peche da rúa Cristóbal Colón para asfaltado

 
O Concello informa de que, unha vez transcorrida a fin de semana, a partir de hoxe, martes 25, pola mañá, queda de novo pechada ao tráfico rodado a rúa Cristóbal Colón co obxecto de estender a segunda capa de aglomerado asfáltico.

Con este labor porase fin ás obras de renovación de servizos e pavimentación plantexadas para esta vía, situada nas inmediacións da igrexa parroquial de Santa Uxía.

Comisión de Educación do Eixo Atlántico

A casa consistorial será escenario no día da mañá, mércores, dunha reunión da Comisión Delegada de Educación do Eixo Atlántico do Noroeste Peninsular.

Con tal motivo desprazaranse ata Ribeira unha vintena de representantes de distintos concellos que forman parte desta entidade, concibida para afianzar as relacións de cooperación entre Galicia e o norte de Portugal. Entre os municipios que confirmaron a súa presenza, figuran A Coruña, Carballo, Monforte, Ribeira, Santiago, Sarria, Vigo, Vilagarcía, Barcelos, Guimaraes, Viana do Castelo, Vila Real, Vila Nova de Famalicao e Matosinhos. O secretario xeral do Eixo, Xoán Vázquez Mao, tamén estará presente no encontro xunto con Rita Fidalgo, responsable de Programas e Cooperación.

A comisión será  recibida no salón de plenos da Casa do Concello polo alcalde ás  10.30 horas para, acto seguido, trasladarse á sede do Círculo Mercantil, no que se desenvolverá o encontro para tratar asuntos relacionados coa próxima organización da terceira Mostra Musical do Eixo Atlántico en Vilagarcía.

Despois da reunión farán unha breve visita turística polos lugares máis salientables do municipio.

• A carpa, cuxo custe ascenderá a 90.000 euros, permanecerá namentres se constrúe o novo mercado
• Prevese o 9 de xaneiro como peche da praza de abastos actual, para deixar pasar as complicadas festas do Nadal

(download)

Click here to download:

Ribeira_26_postos_en_menos_de_.zip (5.27 MB)

O devandito lugar está situado a escasos 30 metros da praza de abastos, nun solar ubicado a carón da rúa Canarias e da praza de España e lindando cun aparcadoiro público. Na parcela habilitarase unha carpa pneumática de 461 metros cadrados en cuxo interior distribuiranse 26 postos: 16 de pescados e mariscos, 4 de carnicería, 3 de conxelados (un deles tamén ten embutidos) e 3 froiterías.  

A carpa contará ademais con aseos (masculino, feminino e para minusválidos), un almacén de 27 metros cadrados e un distribuidor de 10 metros cadrados, entre outros espazos. 

90.000 euros de investimento

O custo derivado da carpa máis as obras de acondicionamento ascenderá a 90.000 euros. 

Durante o encontro acordouse que a distribución dos postos se fará por sorteo. 

Tendo en conta a importancia comercial das festas de Nadal para os vendedores da praza, estableceuse como data máis probable para o peche da mesma o luns día 9 de xaneiro, unha vez transcorridas esas celebracións.  

Ademais, o alcalde informoulles aos comerciantes que acudiron á cita de que, pechada a praza de abastos e durante un prazo aproximado de 10 días, se requirirá o cese da actividade de venta para proceder co traslado ata a carpa das cámaras frigoríficas e outros materiais.

Antes, en Certo:

Sindicatos: vanse para as antigas oficinas de Servizos Sociais

Rocapellón, Deán Grande e mercado: novidades sobre estas zonas

Pode que tamén lle interese:

Obradoiro: dores neuropáticas e fibromialxia. O mércores 23 de novembro

Día da Infancia: acto o 9 de decembro no auditorio

• O alcalde prometeu unha "Semana do Mar" o vindeiro ano para promocionar produtos pesqueiros

O alcalde, Manuel Ruiz Rivas, foi o encargado de entregar os diplomas a cada un dos participantes, así como unha placa conmemorativa no caso do concurso de escaparates. Durante a súa intervención, o rexedor riveirense manifestou que o salto de calidade que experimentou este ano a feira mariñeira derivou exclusivamente da implicación de todos os establecementos que se quixeron sumar ao evento e expresou o seu desexo de que sirvan de punta de lanza para que outros negocios se involucren o ano que ven. 

Manuel Ruiz aproveitou o seu discurso para pedir a colaboración de todos os presentes na Semana do Mar que está organizando o Concello para o ano que ven, e que entre outros obxectivos busca poñer en valor aqueles produtos pesqueiros e marisqueiros que agora non teñen tan fácil saída comercial como outros que están máis promocionados.  

No transcurso do acto, Ruiz Rivas estivo acompañado na mesa presidencial dos concelleiros municipais de Cultura e de Comercio, Elvira Pisos e Anxo Orellán, respectivamente; así como do secretario da Asociación de Empresarios de Riveira, José Antonio Nespereira. 

Ademais de Electrodomésticos Sampedro os establecementos que tomaron parte no concurso de escaparates foron Alalba, D´Nacar, Xoguetes Toy Sur, Pastelería Fina, Rincón del Chocolate, e Teresa Arreglos de Confección. 

En canto aos establecementos hostaleiros: A Caseira, A Cuba, Aimar, As Fillas de Bande, A Taberna do Riaso, Botter, Brétema, Capitán Morgan, Carballoso, Ceos, Coliseo, Golfox, Kukua, La Brasa, Leiro, Noite Meiga, O Parque de Atrás, O Paseo de Coroso, Pepe`s e Plaza.

Relacionada:

Feira Mariñeira: Imaxes

Pode que tamén lle interese:

Cursos de danza: abre o prazo ata o 30 de setembro

Sálvora C.F.: este sábado 3 presentan as categorías inferiores

Novo posto para o alcalde: no Consello de Portos de Galicia

Festas de Santa Uxía: o luns 12 de setembro, concurso de baile

Andaina popular: o sábado 3 de setembro

Caricaturas de Pepe Núñez: ata o 15 de outubro no auditorio

• O traslado permitirá que os locais da rúa Correos sexan ocupados por sindicatos ou extensión agraria alomenos temporalmente 
• Os praceiros van ser reubicados nunha carpa provisional este mesmo ano ao pé do inmoble
• As previsións apuntan a que a obra será adxudicada no primeiro semestre de 2012

Ribeira, 19 de agosto de 2011. – O Concello informa de que en breve se van iniciar labores de traslado do Departamento de Servizos Sociais e do Centro de Información á Muller (CIM) dende as instalacións actuais na rúa Correos de Santa Uxía ás novas dependencias que se situarán na praza de 8 de marzo (no edificio Miradoiro de Padín). Así, a intención do Executivo Local é que a principios de setembro estea culminada a mudanza do mobiliario para a continuación acometer o traslado dos traballadores. 

Este cambio de dependencias reviste gran importancia ao significar un transcendente paso na execución do proxecto do novo mercado municipal. Isto é así porque, como consecuencia do traslado do CIM  e dos Servizos Sociais, os locais situados na rúa Correos quedan expeditos para o seu uso polos sindicatos ou polos servizos de extensión agraria, cuxas sedes actuais están localizadas como é sabido no actual inmoble da praza de abastos. Esta ocupación tería en principio carácter temporal, pero non se descarta que sexa definitiva dependendo de como cristalicen as xestións que está realizando ao respecto o Goberno Local. 

Demolición

Así e logo, de resultas de todo o explicado seguen en pé os prazos estimados inicialmente polo novo Goberno e, salvo contratempo, este mesmo ano terá lugar o traslado provisional dos praceiros e praceiras que operan no mercado a unha nova ubicación. Por outra banda, se non da tempo a proceder no presente exercicio coa demolición física do edificio, alomenos si se iniciará o expediente de derrubo. 

En canto ao lugar no que se emprazarán provisionalmente os vendedores, o Concello anuncia que será nunha carpa instalada nas inmediacións deste inmoble, cunhas dimensións de 15x30 metros (450 metros cadrados). 

Ribeira Atlántica

Con respecto ao novo mercado propiamente dito (unha actuación adscrita ao programa con financiamento europeo Ribeira Atlántica), cómpre informar que xa foi iniciado o expediente de contratación do proxecto técnico e que a previsión do Executivo é adxudicar a súa construción no primeiro semestre de 2012. Está previsto que o edificio quede totalmente rematado antes de finalizar o 2013. 

O presuposto global da actuación ascende a 4.980.860,61 euros: cifra na que se inclúe a construción do mercado, o traslado provisional das praceiras e praceiros a outra ubicación e a urbanización do entorno comercial das Carolinas. Non se inclúe o aparcamento subterráneo do Malecón (outro proxecto ligado ao novo mercado) por preverse que este teña lugar baixo sistema concesional.

Antes, en Certo:

Fondos Europeos: cinco millóns para 11 actuaciones. Entre elas, Ribeira Atlántica

Pode que tamén lle interese:

Feira Artesanal e Mariñeira: do 19 ao 21. Programa

• Agárdanse un cento de postos e paradas
• A feira estará amenizada por actividades que van dende o circo á pirotecnia, pasando por xogos infantís, teatro e música

Fágase unha idea desta feira vendo as imaxes do ano pasado

Ribeira, 17 de agosto de 2011.- Un cento de postos e paradas participarán os vindeiros días 19, 20 e 21 de agosto na quinta edición da Feira Artesanal e Mariñeira de Riveira na que ademais da parte expositiva daranse cita todo tipo actividades de rúa, música tradicional galega e portuguesa, teatro e circo ambulante, contacontos, zancudos, xigantes e cabezudos, xogos infantís, pirotecnia, e outras accións que encherán o acontecemento de divertimento e animación. 

Os concelleiros de Comercio e Turismo, Anxo Orellán, e de Cultura, Elvira Pisos, foron os encargados de explicar polo miúdo o programa desta feira e destacaron a gran implicación recibida por parte de comerciantes e hostaleiros nesta convocatoria. Tamén interviron na presentación os técnicos municipais Unai González e Chiki Durán. 

Sobre a parte expositiva, Elvira Pisos destacou que este ano houbo o dobre de solicitudes que postos se concederon, pois a organización preferiu priorizar “a calidade e diversidade de postos e produtos a ofrecer antes que a cantidade”. Estes stands proceden de lugares como Francia, Portugal, Marrocos, Arxentina, Brasil, Cuba, India e de boa parte de España como Andalucía, Valencia, Cataluña, Asturias, Estremadura, A Rioxa, Castela A Mancha, etc... o que vén  consolidar esta feira como referente en Galicia e en España.  

En canto ao lugar de celebración, nesta edición cambia o itinerario e primarase a zona do Malecón en canto a área expositiva, pois é intención do Concello seguir abrindo o evento ao mar para resaltar a súa temática. Non obstante, tamén se emprazará en zonas peonís como a rúa de Santa Uxía e haberá actividades no entorno da Igrexa parroquial, nas prazas do Concello, Pablo Neruda, de Vigo ou de Ourense, etc... ademais do propio Malecón. 

Concurso de escaparatismo

Segundo referiu Anxo Orellán, esta feira vai supoñer un impulso ao turismo e ao comercio da cidade, e para este fin cóntase coa colaboración da Asociación de Empresarios e do Centro Comercial Aberto Viamare. Unha das novidades desta edición será un concurso de escaparatismo de temática artesanal e mariñeira na que participarán sete establecementos. 

Rutas de tapeo mariñeiro e de cócteis

Outra das novas iniciativas promovidas foi a de involucrar a hostalería local a través de dúas actividades: unha ruta de tapeo mariñeiro (os bares e cafeterías inscritos porán a disposición dos clientes tapas realizadas con produtos do mar) e unha ruta de cócteis da feira (que ofrece a posibilidade de degustar un cóctel propio e único en cada establecemento participante, todos eles con nomes mariñeiros: dorna, galerna, rompente mariña... e así ata 20 variedades). 

Moitos establecementos organizarán ademais actividades paralelas como concertos, exposicións, menús mariñeiros, conxuros de queimadas.... Ademais, algúns establecementos comerciais participarán na parte expositiva da feira ou ben abrirán os seus locais a fin de semana para aproveitarse do tirón de visitantes que se prevé recibir. 

En canto aos elencos que se encargarán de animar as rúas durante a feira, cabe destacar entre eles Confusión de Toledo (con ogros xigantes, figuras...), Al-Folk (formación musical arábigo-andaluz), o grupo de gaitas A Gandaina de Palmeira, Bom-Bom (teatro ambulante, encantadores de serpes...), Tuttis Catraputtis (grupo de música tradicional portuguesa), Cenáculo Teatro (circo e animación de rúa), Pista Activa (acrobacias, clown, malabares...), A Roda (circo) e Atraspies Circo (espectáculo circense). 

A organización quixo destacar tamén a implicación de distintas asociacións do municipio, como as Amas de Casa ou “Riveira escríbese con v” e convidar á xente que acuda a feira a vestirse de época para darlle máis sabor mariñeiro á feira.

Programa detallado:

Click here to download:

Programa da Feira Artesanal e Mariñeira.pdf (1.62 MB)

(download)

Click here to download:

Programa da Feira Artesanal e Mariñeira.pdf (1.62 MB)

Pode que tamén lle interese:

Homenaxe: este sábado 20 de agosto, á Galiza Mártir

Vía

Pode que tamén lle interese:

Teatro: o 27 de agosto, "Pisados". A historia de Botamán de Melide en Portosín

• A praza de abastos tamén se beneficiou da iniciativa municipal  

(download)

Click here to download:

Ribeira_o_Concello_cualifica_d.zip (5.06 MB)

Calzados, téxtil, legumes, churros, repostería, hortalizas, froitas ou marroquinería foron algúns dos xéneros que se puideron comprar no mercado ambulante, que se desenvolverá todos os venres. A isto hai que engadir que a praza de abastos ao pé rexistrou tamén unha notable actividade comercial, que é ao fin e ao cabo un dos principais obxectivos con que o Concello decidiu acometer esta acción. 

Aparcamento na Horta do Cura

Para facilitar o acceso de posibles usuarios ao mercado, o Concello habilitou unha área de aparcamento gratuíto no entorno da zona coñecida como Horta do Cura que tamén presentou bastante movemento. 

Cabe recordar que hai más de 40 demandantes de puntos de venta en lista de espera aos que a Concellería de Consumo que dirixe Vicente Mariño de Bricio procurará atopar espazo nas próximas semanas ampliando o mercado.

Horario da biblioteca: o habitual dende luns que vén

Por outra banda, o Concello informa que a Biblioteca Pública Municipal regresa por decisión dos usuarios ao seu horario habitual, de tal xeito que estará aberta de 10 a 14 e de 17 a 21 horas, de luns a venres. 

Este novo horario farase efectivo a partir do vindeiro luns 8 de agosto.

Pode que tamén lle interese:

Ribeira: as Festas do Verán, ata o domingo 7. Programa completo

• O concelleiro De Bricio estivo na parroquia para coordinar a distribución de espazos 
• Vaise ampliar canto antes, pois hai unha lista de agarda de 40 comerciantes
  

Ribeira, 4 de agosto de 2011. – Seguindo as previsións, mañá venres día 5 de agosto abrirá o novo mercadillo de Palmeira e serán setenta os postos que pola mañá, en horario de 9 a 14 horas, estarán distribuídos na rúa da canle, a explanada de aparcamento da praza de abastos e outras zonas adxacentes ao mercado municipal da parroquia. 

Para coordinar a distribución dos postos personouse na mañá de hoxe na zona en cuestión o concelleiro responsable da área de Consumo, Vicente Mariño de Bricio, en presenza da maior parte dos comerciantes que mañá participarán no mercado ambulante. Entre os xéneros que os veciños e visitantes poderán mercar, hai desde téxtil, calzados ou marroquinería ata froitas, hortalizas, legumes, churros ou repostería. 

O edil municipal lembrou que esta acción nace en resposta á demanda dos propios empresarios da parroquia de Palmeira e, en especial, dos que traballan na actual praza de abastos, co obxectivo de dinamizar a actividade comercial da localidade. 

Mariño de Bricio informou de que hai máis de 40 demandantes de postos en lista de espera, razón pola cal xa se están estudando novas zonas de ampliación da iniciativa. Algo que se pretende executar nas vindeiras semanas.

Antes, en Certo:

• Agardan que o primeiro sexa xa o venres 5 de agosto
• Irá no exterior da praza de abastos de Palmeira

(download)

Click here to download:

Ribeira_Palmeira_ter_mercadill.zip (5.32 MB)

Ribeira, 29 de xullo de 2010.- Palmeira contará a partir do vindeiro venres cun mercadillo ambulante. Así o anunciou hoxe o concelleiro que ten as competencias de Consumo, Vicente García de Bricio, no lugar onde se emprazará a iniciativa, concretamente na zona exterior da praza de abastos da parroquia. 

Mariño de Bricio, que estivo acompañado dos concelleiros naturais de Palmeira Mª Carmen Vizcaya Sampedro e Emilio Pérez Outeiral, xustificou esta acción como unha medida para dinamizar a actividade comercial da parroquia, que nace a instancias precisamente dos propios comerciantes do pobo e moi especialmente dos que operan no mercado de abastos. “Fai máis ou menos un mes, os comerciantes de Palmeira subliñáronme a necesidade de reactivar o seu movemento comercial –afirmou- e o Concello púxose inmediatamente mans a obra para buscar a forma de facelo”. 

O mercadillo terá lugar todos os venres pola mañá e a intención do concelleiro de Mercados e que se inicie xa o próximo 5 de agosto. O Executivo calcula que haberá uns 50 postos, cifra que podería irse aumentando en función da demanda. Terán cabida os xéneros e materias propias de calquera mercadillo convencional: froitas, flores, téxtil, etc... 

Tramitación

O Concello xa dispón dunha lista de interesados en participar e mañá entregaráselle aos responsables de todos os postos do mercado de Riveira unha circular informativa desta nova acción. A este respecto, Vicente Mariño recordou que aqueles que xa dispoñan dalgún posto no mercado de Riveira unicamente deberán abonar a preceptiva taxa pola ocupación do solo, pero non a derivada de expedir o carné de vendedor, que xa teñen. 

Mariño de Bricio fixo un chamamento a aqueles comerciantes que queiran formar parte do mercadillo para que acudan á Casa Consistorial a partir do próximo luns a efectos de realizar as tramitacións oportunas para poder tomar posesión dos postos.  

Por outra parte, manifestou a súa esperanza de que como é intención do Concello, esta iniciativa sirva para revitalizar a actividade comercial en Palmeira e para que a praza da abastos vexa aumentadas as súas vendas. 

Así mesmo, animou aos veciños de Palmeira, do municipio e dos concellos limítrofes, así como aos visitantes que recalan nesta zona na época estival, a que acudan a este novo mercadillo para que sexa un éxito.

Pode que tamén lle interese:

Exposición: Chere, no Liceo ata finais de xullo

III Xornadas de Cultura Urbana: o 22, 23 e 29 de xullo

Rúas Vivas: ésta é a programación de 2011

Galería fotográfica: algunhas imaxes da Feira Medieval 2011