GUILLERME AFIRMA EN MUROS QUE O CAMBIO QUE PROMETE O PP XA O EXPERIMENTOU EN GALIZA “E FOI UN CAMBIO CLARAMENTE PARA PEOR”
O cabeza de lista por A Coruña, Francisco Jorquera, salientou o labor desenvolvido polo BNG na defensa dos intereses de Galiza e tamén de Muros, acadando melloras nos Orzamentos estatais
Muros, 24 de outubro de 2011. O portavoz nacional do BNG, Guillerme Vázquez, afirmou esta tarde nun mitin en Muros que o cambio que o PP promete xa o experimentou no noso país e “foi un cambio claramente para peor”.
Así, o portavoz nacional afirmou que “o cambio do PP en Galiza consistiu en colocar o País na vangarda da destrución de emprego no Estado. Oito de cada novos 100 parados no Estado son galegos".
Guillerme interveu esta tarde na Casa da Cultura nun mitin no que tamén participou a portavoz municipal, María Xosé Afonso; o cabeza de lista do BNG ao Congreso pola Coruña, Francisco Jorquera, e a candidata número 5, Rosana Pérez.
Seguindo coa avaliación do labor do PP en Galiza, Guillerme lembrou que "en 2009 este País tiña tres entidades financeiras propias. Hoxe ningunha".
Tamén no ano 2009, tal e como lembrou Guillerme “este País tiña unha débeda de 3.000 millóns de euros. Hoxe ten unha débeda de 6.900 e lideramos a inflación estatal”.
Por outra banda, Guillerme tamén se referiu á outra gran forza política do Estado: "o PSOE promete que con Rubalcaba Si. Eu dígovos que con Rubalcaba tampouco. É corresponsábel das políticas de recortes do PSOE durante estes anos"
Tal e como enfatizou o portavoz nacional do BNG "a solución á crise non pasa por políticas aínda máis de dereitas. A solución é galega e é de esquerdas e chámase BNG".
“Somos a equipa da casa”, afirmou, “a única forza política que vai poñer a Galiza na axenda do Congreso dos Deputados”.
Francisco Jorquera salienta as melloras logradas polo BNG en Madrid para Muros
Pola súa parte, o cabeza de lista do BNG ao Congreso por A Coruña, Francisco Jorquera, apelou a votar ao BNG aos asistentes ao mitin en Muros e subliñou que o 20-N “elixides aos vosos representantes por A Coruña” e lembrou que o BNG foi a forza política que levou os problemas de Galiza ao Congreso dos Deputados.
Jorquera fixo un chamamento a votar ao BNG “porque non é tempo de alternancias senón de alternativas, é tempo doutras políticas e dun cambio real”.
Jorquera lembrou que “o 20-N non se elixe entre Rajoy e Rubalcaba para Presidentes do Goberno, elixides aos vosos representantes por A Coruña e tedes que pensar nos que vos representen de verdade”. E engadiu que “pese a que algúns presumen de galegos e aspiren a ser Presidentes, seguen ausentándose cando se fala de Galiza”, en clara mención a Rajoy durante o debate de Política Xeral.
Jorquera salientou o traballo do BNG no Congreso onde sempre “defendemos os intereses do noso pais e tamén os de Muros ”, en alusión ás melloras conseguidas nas negociacións dos Orzamentos Xerais do Estado. Neste sentido, puxo de manifesto a necesidade de reforzar ao BNG para aumentar a súa forza e poder “defender mellor os problemas do noso territorio nas Cortes do Estado”.
Reivindicou un cambio de políticas como as que propón o BNG “completamente distintas ás do PP e PSOE”. Así, explicou que o BNG pón por diante as políticas destinadas á cidadanía e “non ao servizo da banca, e destacou a posición contraria dos nacionalistas galegos aos recortes sociais que están a practicar PP e PSOE que “sempre prexudican ás maiorías sociais”.
Jorquera sinalou que os recortes “non se deben facer en educación, nen en sanidade nen en servizos sociais, piares do Estado do Benestar” e explicou que hai outros ámbitos onde meter a tesoira: gasto militar, eliminación das deputacións, redución de Ministerios, e outros ámbitos onde actuar como loitar contra a fraude fiscal ou reformar a fiscalidade.
Antes, en Certo:
Muros, 21 de outubro de 2011. O vindeiro luns, 24 de outubro, vaise celebrar un acto público comarcal do BNG no concello de Muros. No mesmo participarán os candidatos do BNG, Mª Xosé Alfonso, Rosana Pérez, Francisco Jorquera e o portavoz nacional do BNG, Guillerme Vázquez.
É un acto enmarcado dentro da campaña ás eleccións xerais do próximo 20 de novembro.
E un día antes, en Rianxo:
ACTO PÚBLICO DO BNG EN RIANXO CON FRANCISCO JORQUERA, ROSANA PÉREZ E ADOLFO MUIÑOS
O mitin tivo lugar ás 19.30 horas no Cuartel Vello de Rianxo
JORQUERA LEMBRA QUE O 20-N “ESCOLLEDES AOS VOSOS REPRESENTANTES POR A CORUÑA” E SALIENTA QUE “O BNG É A FORZA ÚTIL PARA DEFENDER OS INTERESES DO NOSO TERRITORIO”
O cabeza de lista por A Coruña afirmou que “debedes pensar nos que vos representan de verdade” e subliña que o BNG foi a forza política que levou a Galiza ao Congreso
Rianxo, 23 Outubro 2011. O cabeza de lista do BNG ao Congreso por A Coruña, Francisco Jorquera, fixo un chamamento a votar ao BNG apelando aos presentes no mitin de Rianxo a reflexionar sobrfe cal é a forza útil para Galiza. Ademáis lembrou que o 20-N “escolledes aos vosos representantes por A Coruña, pensade que o BNG é a forza útil para defender os intereses do noso territorio”.
O candidato do BNG explicou que “somos a alternativa útil para defender a Galiza no Estado e tamén somos a forza máis útil para facer realidade un cambio de políticas, un cambio real de esquerdas”. Jorquera engadiu que “somo a equipa da casa” e aclarou que o 20-N non se elixe entre Rajoy e Rubalcaba para Presidente do Goberno, elexides aos vosos representantes por A Coruña e tedes que pensar nos que vos representen de verdade”.
O BNG pensa en políticas para a xente e non ao servizo da banca
Afirmou que Galiza existe no Parlamento do Estado “porque o BNG foi a forza política que a levou ao Congreso”. E puxo de manifesto que “pese a que algúns presumen de galegos e aspiren a ser Presidentes, seguen ausentándose cando se fala de Galiza”. Repasou o labor do BNG no Congreso onde sempre “defendemos os intereses do noso pais e tamén os de comarcas como O Barbanza”, en alusión ás melloras conseguidas nas negociacións dos Orzamentos Xerais do Estado. Subliñou que con dous deputados e un senador “conseguimos incrementar os investimentos en moita maior proporción que outros grupos”.
Por iso, salientou a importanza de reforzar ao BNG para que “podamos garantir que Galiza teña presenza na política estatal”. Manifestou que “somos a alternativa útil nestas eleccións, tanto para Galiza como para reivindicar un cambio de políticas fronte ás propostas de PP e PSOE”. Destacou a necesidade de pór as políticas económicas ao servizo da cidadanía e non ao servizo da banca. Recalcou que o BNG está en contra das políticas de recurtes sociais que afectan ás maiorías sociais, non serven para reactivar a economía e crear emprego.
Así explicou que o BNG aposta por potenciar o investimento público produtivo, reducir a estrutura administrativa eliminando institucións caducas como as deputacións e Ministerios cuxas competencias estáns transferidas ás CC.AA. Tamén defendeu a redución do gasto militar, unha reforma fiscal que grave máis ás rendas máis altas e a loita contra a fraude fiscal, cuestión na que o Estado español está á cabeza. Por último, explicou a proposta do BNG para que exista unha banca pública galega ao servizo das economías da maioría, dos autónomos e pequenas empresas.
Jorquera fixo un chamamento a votar ao BNG “porque non é tempo de alternancias ssenón de alternativas, é tempo doutras políticas e dun cambio real”.
Comentarios [0]