Dodro, 8 de decembro de 2011. O Concello de Dodro a través das distintas concellerías fai pública a programación de Nadal para este ano, cargada de actividades para todas as idades.
A programación comeza o día 10 de decembro co fallo da XXIV edición do Premio Eusebio Lorenzo Baleirón.
O xurado reunirase ás 12h da maña na Casa da Cultura do Concello, coordinado por Helena Villar. O xurado presidido polo alcalde de Dodro Valentin Alfonsín Somoza, está composto ademais pola secretaria, a concelleira de cultura Cristina Codesido e por Carlos Negro Romero, Román Raña Lama, Rosa Enríquez Noya e Luis Valle Regueiro, este último o gañador do ano pasado da edición XXIII do Premio. O fallo do xurado darase a coñecer ó público e ós medios ese mesmo día. Despois do fallo farase unha ofrenda floral onde repousan os restos de Eusebio Lorenzo Baleiron no cementerio de San Xulián de Laiño en Dodro.
O domingo 18 de decembro ás 17 h nun acto público farase a entrega do premio no CPI Eusebio Lorenzo Baleirón de Dodro, coa actuación de Campo de Estrelas.
Dentro da programación de Nadal a Concellería de Deportes organiza o día 17 de decembro a III Xornada Benéfica Deportiva cun campionato de fútbol 2 x 2 dirixido a todas as idades, circuito pechado para bicicletas e campionato de portería hinchable. Nesta xornada recolleranse alimentos non perecedeiros que serán distribuídos entre as familias con menos recursos do concello.
Os días 19, 20 e 21 de decembro esta mesma concellería organiza o I Mundialito de Fútbol Sala por aldeas do Concello de Dodro. Terá lugar no pavillón municipal de Dodro e haberá dúas categorías. A inscrición debe realizarse no departamento de deportes.
As concellerías de Cultura e Xuventude e Familia organizan conxuntamente Teatro para todas as idades para o día 22 de decembro ás 20 h no salón da Paxareira. A obra representada por Os Tolitates titulase “O merlo branco”, é a historia dun pequeno merlo que busca saber quen é.
Os máis pequenos son os que disfrutarán dunha amplia e variada programación de actividades e obradoiros este Nadal organizadas conxuntamente polas concellerías de Servizos Sociais e Igualdade e a de Xuventude e Familia.
Para a conciliación da vida laboral e familiar haberá Obradoiros infantís nas vacacións de Nadal. Serán na Casa da Cultura do Concello de 16h a 19h do 26 ó 29 de decembro e o 3 e 4 de xaneiro. Dentro das actividades programadas haberá dous días Cine, Globoflexia, Xogos e adornos, Nadal musical e carta ós Reis Magos.
O día 23 de decembro Papa Noel recibirá a todos os nenos/as de Dodro, onde ademais haberá títeres e xogos infantís.
O día 30 de decembro gran Festa de Fin de Ano para os nenos/as do Concello. Haberá contacontos o “Trasno Ito”, manualidades, xogos e baile hasta fartar.
E o día 2 de xaneiro o Carteiro Real visitará Dodro para recoller as cartas para os Reis Magos ós mais cativos. Haberá títeres “Ilri, axudante de Papa Noel”, xogos e animación.
Celébrase o I Concurso de Pasteis, Doces e Biscoitos que será o día 5 de xaneiro na praza do concello. Todos os que queiran participar poderán inscribirse no teléfono 981 802 466 antes do 4 de xaneiro. Haberá tres primeiros premios.
A programación de Nadal rematará coa CABALGATA DE REIS que se celebrará por primeira vez no Concello de Dodro en colaboración con Asociacións do concello e diversas empresas. Sairá do Polideportivo Municipal e rematará na praza do concello, na que estará instalada unha carpa onde os Reis Magos serán recibidos polo alcalde e farán a ofrenda o neno Jesús. A continuación recibirán as peticións de todos os nenos/as ós que entregarán un agasallo e golosinas. Todos os asistentes disfrutarán dun chocolate con churros e haberá servizo de autobuses que percorrerá todo o municipio.
Antes, en Certo:
Cabalgata de Reis: colaboración de asociacións de veciños
Concurso: I Concurso de Pasteis e doces o 5 de xaneiro
Un xoguete, unha ilusión: novo programa solidario
Comentarios [0]