• Os 35 alumnos, formados xa en xardinería, carpintería e pavimentación, recibiron os seus diplomas acreditativos e agora buscan traballo

Ribeira, 22 de decembro de 2011- O parque periurbano de San Roque viviu na tarde de onte a clausura do obradoiro de emprego Airoas: un acto ao que acudiron -ademais dos 35 alumnos maiores de 25 anos que estiveron dende hai un ano a asistir a esta iniciativa, así como os seus mestres e demais persoal formativo- distintas autoridades en representación das institucións organizadoras da iniciativa (Consellería de Traballo e Benestar e Concello de Ribeira), tales como a delegada territorial da Xunta en A Coruña, Belén Docampo; o director xeral de Promoción do Emprego, Andrés Hermida; e o alcalde Manuel Ruiz.. 

Que o parque periurbano fose o lugar escollido para desenvolver o acto de hoxe serviu para amosar as principais melloras promovidas a través do traballo realizado polos alumnos ao longo do curso,   como por exemplo a pavimentación con adoquinado de granito da entrada principal ao parque (tamén se actuou nos outros tres accesos existentes), a elaboración e colocación dunha pasarela de madeira que da acceso ao Centro de Interpretación, a dotación de diversos puntos de luz e dun arco de madeira na zona de entrada ou mesmo a construción en madeira dunha parada de autobús. 

Estas e outras accións foron desenvolvidas polos 35 estudantes repartidos en tres especialidades (xardinería, carpintería e pavimentación), os cales recolleron hoxe os seus correspondentes diplomas acreditativos nun acto que comezou coa intervención da directora do curso, Uxía Argibay. 

Verbas de felicitación e ánimo

Pola súa parte, tanto Manuel Ruiz como Belén Docampo e Andrés Hermida quixeron felicitar ás 35 persoas asistentes ao obradoiro polo gran traballo desenvolvido e coincidiron en salientar que o acto de hoxe non é un fin senón que marca un principio á hora de que estes alumnos poidan acudir con mellores opcións ao mercado laboral: algo para o cal lles quixeron dar moitos ánimos. 

Doutra banda, o alcalde xa adiantou que realizará xestións en orde a intentar conseguir para Ribeira no vindeiro verán unha nova escola obradoiro, que neste caso iría dirixida a persoas menores de 25 anos. Cómpre salientar que este concello é dos máis favorecidos por este tipo de iniciativas, namentres que noutros concellos veciños levan anos sen ter nada semellante. 

Antes, en Certo:

Airoas: o obradoiro de emprego cumpre mellor ca os políticos

• O parque de San Roque foi o principal beneficiario do traballo deste obradoiro
• 35 alumnos-traballadores en carpintería, xardinería e pavimentación con lastros aproveitan esta iniciativa para completar a súa formación
  

Ribeira, 14 de novembro de 2011.- O obradoiro de emprego Airoas -a través do cal se están a formar un total de 35 alumnos maiores de 25 anos- xa está na recta final e a veciñanza xa pode disfrutar da meirande parte dos traballos levados a cabo dende que principiara a iniciativa en decembro do pasado ano. De feito, a falta de pouco máis dun mes para a clausura do taller, xa foron executadas máis dos 90% das actuacións programadas nas tres especialidades que foron habilitadas: carpintería, xardinería e pavimentación con lastros. 

Unha vez máis, o Parque Periurbano de San Roque erixiuse na principal área beneficiada dos traballos desenvolvidos ao longo do curso. Tanto é así que os labores de pavimentación e axardinamento da entrada principal dende a estrada de Frións e a zona de aparcamento xa están practicamente rematados a falta de dar os últimos retoques. 

Outras intervencións realizadas no parque de San Roque foron a pavimentación con adoquinado de granito das catro rampas existentes de acceso ao parque e a canalización e recollida de pluviais en diversas zonas do mesmo (pavimentación), a conformación de sementeiros e plantas no invernadoiro do enclave (xardinería), ou a elaboración e colocación dunha pasarela de madeira de acceso ao Centro de Interpretación, de diversos puntos de luz e dun arco de madeira na entrada principal (carpintería). 

Pero as actividades desenvolvidas foron máis aló do recinto periurbano e, por exemplo, os alumnos inscritos na especialidade de pavimentación desenvolveron diversas actuacións dirixidas á eliminación de barreiras arquitectónicas, como a colocación de rampas en Amicos e nos colexios de Frións e Oleiros, e unha beirarrúa en Cubeliños. 

Polo que atinxe á  especialidade de carpintería, algunhas das actuacións dos alumnos centráronse na fabricación, mantemento e reparación no seu caso de mobiliario urbano nas distintas parroquias do concello (fabricación de taboleiros informativos, bancos, papeleiras, bancos, xardineiras, mobles de oficina,  reparación de pasamáns e de casetas vestiarios...). Tamén levaron a cabo traballos de reparación na Casa da Xuventude. 

En canto a xardinería, ademais dos traballos no parque antes citados, procederon a realizar labores de axardinamento e instalación de rego no CEIP de Aguiño e o mantemento de distintos espazos verdes do Concello. 

Paralelamente a estas e a outras actuacións que repercutiron no benestar e calidade de vida da veciñanza, o curso dou cabida a outras accións que incidiron na formación dos propios participantes. Así, 14 dos alumnos matriculáronse na ESA a distancia (Educación Secundaria de Adultos), tiveron ocasión de asistir a un ciclo de alfabetización informática e a senllos cursos de prevención de riscos laborais, primeiros auxilios ou motivación emprendedora. 

A día de hoxe, no obradoiro se está a traballar en diversos aspectos ligados á inserción laboral dos alumnos traballadores (elaboración de currículo, carta de presentación, entrevista de traballo...) e xa se iniciaron contactos con empresas da zona a fin de sondear o mercado.  
 

Ribeira, 22 de xuño de 2011. Nas Aulas de Formación da Rúa Cristobal Colón de Santa Uxía deu comezoo esta mañá o Curso de Atención Sociosanitaria a Persoas no Domicilio, organizado polo Concello coa colaboración da Consellería de Traballo da Xunta de Galicia, e ao que están asistindo catorce veciños e veciñas en situación de desemprego do municipio. 

Os novos concelleiros de Fomento do Emprego, Comercio, Turismo e Pemes, Anxo Orellán Fernández, e de Servizos Sociais, Promoción Social, Sanidade e Consumo, Vicente Mariño de Bricio, visitaron as instalacións municipais para darlles a benvida aos participantes nesta acción formativa de 618 horas de duraciós. 

Durante as súas respectivas intervencións, os edís municipais describiron o contido da actividade e fixeron fincapé na ampla saída laboral que está a ter nestes momentos a atención sociosanitaria en domicilios. 

O curso prolongarase ata o 18 de novembro e terá lugar nas aulas de Cristobal Colón todos os días de luns a venres, entre as 8.30 e as 14.30 horas.

(download)

Click here to download:

Ribeira_comezou_o_curso_de_ate.zip (4.83 MB)

Relacionada:

Obradoiros para maiores: clausura do de reforzo educativo

Ribeira, 11 de maio de 2011. O Obradoiro de Emprego Airoas comezou a impartir o Módulo de Sensibilización Ambiental o pasado venres 29 de abril, cunha ponencia no salón de actos do Parque Periurbano de San Roque, coa colaboración externa do biólogo Juan José Sampedro Reiriz.

A esta presentación, que se fixo amena e moi participativa, asistiron tódolos alumnos-traballadores de Airoas. O seu obxectivo xeral é introducir ao alumnado no coñecemento dos principais problemas medioambientais, tanto a nivel xeral como no ámbito laboral, e a súa aplicación na especialidade profesional.

Na  primeira xornada distinguíronse tres partes fundamentais:

.- Exposición e explicación de conceptos básicos  como son medioambiente, ecoloxía, cadena trófica, ecosistema, recursos naturais, hábitat, biodiversidade, pegada ecolóxica, cambio climático, contaminación e desenvolvemento sostible.

.- Os efectos da actividade humana sobre o medio. Déronse a coñecer as consecuencias irreversibles da nosa acción sobre o medioambiente, e como o ser humano muda o estado natural coas consecuencias que disto se derivan, e que non só van afectar ao medioambiente natural, senón tamén ao medio urbano e ao noso traballo, á saúde e á economía.

.- Posibles solución e actitudes a seguir tanto a nivel social-individual e a nivel das administracións ( competencias da UE, do Estado, Xunta, Concellos)

 Os  obxectivos didácticos que se pretenderon  acadar son  entre outros, os seguintes:

   1. Comprender a definición de medioambiente e achegarse ao coñecemento dos principais problemas medioambientais. 
   2. Obter un nivel de sensibilización e de respecto polo medioambiente desde un punto de vista científico.
   3. Comprender a diferencia entre recursos naturais renovables e non renovables, así como do tempo preciso para recuperalos, por medio dun exemplo práctico: cando estamos facendo uso dunha enerxía (o petróleo) que precisa millóns de anos para producirse e unhas poucas horas para consumirse.
  4. Coñecer o concepto de sucesión natural, e comprender como muda logo dunha alteración do medioambiente.
   5. Aplicar á especialidade profesional os conceptos adquiridos co desenvolvemento de boas prácticas medioambientais no traballo.
   6. Achegarse aos aspectos legais  da figura da responsabilidade medioambiental e a necesidade da sostibilidade ambiental, principalmente: a Lei de responsabilidade medioambiental,a lei de residuos e  os estudos de impacto ambiental.

Utilizando tódolos conceptos básicos explicados,e mediante exemplos da nosa realidade máis próxima chegouse a comprender e a sensibilizar sobre o noso compartamento  cara aos efectos sobre o cambio climático e maila contaminación nas súas diferentes formas.

Antes, en Certo:

• Ribeira: Airoas e os nenos de Aguiño plantan e sementan xuntos

Ribeira, 6 de maio de 2011. O obradoiro de emprego de Ribeira, Airoas, realizou unha actividade de colaboración co colexio público de Aguiño este xoves 5 de maio .Nela participaron tres grupos de nenos de Educación Primaria de diferentes idades (6, 9 e  10 anos) e o mestre cos alumnos-traballadores da especialidade de xardinería.

Os escolares puideron aprender a plantar varias especies de árbores (cinco liquidambars, sete camelias e un piñeiro piñoneiro, e tamén viron o semilleiro, onde os alumnos de Aguiño gozaron misturando substrato e sementeira.
 
Ademais disto, o obradoiro de emprego Airoas tamén colabora co Ceip de Aguiño noutras actividades como o desbroce e limpeza dos vexetais do recinto e o axardinamento dunha parte dos seus terreos e a montaxe do regadío da mesma.

(download)

Click here to download:

Ribeira_segue_a_bo_ritmo_a_rep.zip (6.15 MB)

Ribeira, 21 de marzo de 2011. Os responsables municipais de Educación e de Turismo, Juana Ermitas Crugeiras Vidal e Vicente García Rivas, achegáronse esta mañá ao Parque Periurbano de San Roque co fin de visitar e inspeccionar dúas actuacións que se están a realizar neste espazo aledaño á cidade barbanzana. Trátase, por unha banda, do obradoiro de emprego Airoas, iniciado oficialmente o 27 de decembro e do que xa se poden observar resultados tanxibles do labor efectuado, e, por outra, dunha acción de repoboación forestal desenvolvida polo Concello con financiamento da Consellería de Medio Rural da Xunta de Galicia. 

Polo que respecta ao obradoiro Airoas, cabe recordar que neste programa mixto de emprego-formación participan un total de 35 persoas maiores de 25 anos nalgunha destas tres especialidades: xardinería, carpintería e pavimentación con lastros. A directora do obradoiro, Uxía Argibay, foi explicando aos edís riveirenses as obras que se están a facer, como a substitución do firme de zahorra existente por un acabado de adoquín de granito  nas zonas de acceso rodado e peonil do parque, así como a dotación de axardinamento e mobiliario na área de aparcamentos existente pola banda da estrada de Frións. 

Outra das accións que están a realizar os alumnos-traballadores do obradoiro Airoas é  a construción dunha pasarela de madeira dende o acceso ao parque ata o Centro de Interpretación Arqueolóxica. Irá equipada con barandas e farois de madeira. 

800 árbores

A outra grande iniciativa que se está a facer nestes momentos é unha repoboación forestal que obra sobre diferentes zonas do parque periurbano, de 171.000 metros cadrados de superficie. Con financiamento da Consellería de Medio Rural, a actuación ascende a 59.000 euros e inclúe a plantación de case 800 árbores de distintas especies: entre eles, 125 carballos, 125 carballos cerquiños, 250 castiñeiros, 150 bidueiros, 25 sobreiras e 50 loureiros. 

Con cargo a esta mesma iniciativa figuran tamén a limpeza das marxes de tres accesos (o que parte da zona dos Xulgados, o que provén de Cruxeiras e o da capela de San Roque), o desbroce con tractor debaixo do miradoiro e no contorno do lavadoiro, ademais de nunha zona concreta de plantación con frondosas; e a eliminación de árbores invasoras, especialmente os eucaliptos mozos. 

Vicente García resaltou o interese do Concello de seguir actuando sobre a que é unhas das principais áreas de esparcemento do municipio, á que se pretende potenciar como elemento de atracción turística ademais de servir de lugar de uso e disfrute dos veciños e un pulmón verde para a Centenaria. 

Pola súa parte, Crujeiras Vidal puxo de releve o importante labor que están realizando os alumnos do obradoiro Airoas, que ademais de abundar na súa propia formación de cara a súa inserción laboral redunda na mellora do municipio en xeral e do parque de San Roque en particular.

Os alumnos, 23, formáronse nas especialidades de albanelería e cantería nunha acción que costou medio millón de euros

Desta iniciativa sairán alumnas e alumnos con experiencia en xardiñería, carpintería e pavimentación con lastros

(download)

Click here to download:

Ribeira_o_obradoiro_de_emprego.zip (5.44 MB)

Neste obradoiro vanse a impartir tres especialidades: xardinería (no que participarán tres homes e sete  mulleres), carpintería (oito mulleres e dous homes) e pavimentación con lastros (cinco mulleres e dez homes).

Durante a apertura desta escola taller, cofinanciada polo Concello e a Xunta, o alcalde José Luis Torres Colomer foi o encargado de presentar a actuación ante a nova promoción de alumnos-traballadores, cuxa formación se prolongará ata decembro de 2011. Cabe recordar que Ribeira xa foi obxecto doutros obradoiros de emprego, baixo as denominacións de Illa de Sagres, Illote Noro e Illote Noro 2.

O novo equipo formativo estará dirixido por Uxía Argibay , que se encargará da coordinación xeral do obradoiro de emprego, así como das relacións co exterior: consellería, entidade promotora, empresarios. Ademais, o equipo vai estar composto por outras oito persoas: un mestre para pavimentación con lastros, outro para xardinería e outro para carpintería, unha titora, un mestre de educación, un mestre de xestión empresarial, un auxiliar administrativo e unha condutora/ordenanza.

Actuacións previstas

Cenador de madeira realizado polo obradoiro 'Illote Noro II"

En canto ás actuacións que se van a realizar, unha vez máis o Parque Periurbano de San Roque será o principal beneficiado dos traballos: concretamente, a través da pavimentación e axardinamento na zona da entrada a este recinto dende a estrada xeral que pasa por Frións e a realización da segunda fase do empedrado no acceso peonil que parte dende a zona dos Xulgados de Santa Uxía.

Outras actuacións que se ten previsto realizar son o mantemento e mellora de parques e xardíns municipais e a construción de equipamentos de madeira e de casetas-vestiarios para espazos públicos.

Ribeira, 25 de outubro de 2010. A Consellería de Traballo e Benestar da Xunta de Galicia vén de informar favorablemente sobre a celebración en Ribeira dun novo obradoiro de emprego, destinado á formación teórico-práctica de persoas maiores de 25 anos con dificultades de inserción laboral. 

Nesta ocasión (e proseguindo coa política de adoptar nomes relacionados coa toponimia náutica riveirense), denominarase “Airoas” ao obradoiro (os anteriores chamáronse “Illa de Sagres”, “Illote Noro” e “Illote Noro 2”). A escola formará a un total de 35 persoas nalgunha destas tres especialidades: carpintería, xardinería ou pavimentación con lastros. 

Melloras en San Roque

O Concello pretende seguir aproveitando a oportunidade desta iniciativa para seguir facendo melloras no municipio e, unha vez máis, incidirase especialmente na adecuación do Parque Periurbano de San Roque.  

Así, entre as actuacións que se contemplan figuran o adoquinado da zona de acceso a San Roque dende a estrada de Frións, a execución da segunda fase da pavimentación do camiño que enlaza o parque coa cidade riveirense dende a zona dos Xulgados e a realización dun aparcamento e dunha zona axardinada no recinto, ademais doutros traballos como a confección de mobiliario urbano e de equipamento municipal.

(download)

Click here to download:

Ribeira_o_alcalde_pide_outro_o.zip (5.02 MB)

Ribeira, 25 de xuño de 2010.- O Obradoiro Illote Noro 2 chegou hoxe ao seu fin cun acto de clausura no que os 26 alumnos–traballadores (17 mulleres e 9 homes) que participaron na iniciativa recolleron os seus diplomas tras un ano de traballos. Cabe recordar que a meirande parte destes labores se concentraron no Parque Periurbano de San Roque, de 180.000 metros cadrados de superficie, no obxectivo de converter esta área nun referente para o lecer dos veciños do municipio e nun foco de atracción turística. 

A clausura do obradoiro contou coa participación do alcalde, José Luis Torres Colomer; do director xeral de Promoción do Emprego da Xunta de Galicia, Andrés Hermida Trastoy; da concelleira municipal de Educación Juana Ermitas Crugeiras Vidal, e do director do obradoiro, Juan Ramón Cores Pérez, quen realizou unha proxección de 50 diapositivas para explicar visualmente o traballo desenvolvido no transcurso do taller.

Algunhas das actuacións realizadas no parque foron a restauración do lavadoiro situado no parque e a rexeneración do seu entorno; a pavimentación do camiño que conecta o parque coa cidade de Santa Uxía (a través da zona dos xulgados); a construción dun sistema de recollida de pluviais; a restauración do anfiteatro (obra que tamén incluíu o empedrado do camiño que  une esta edificación coa zona de baños), a restauración do área de picnic, a construcción dunha rocalla cun ceador, a elaboración de bancos/xardineiras na zona de acceso e a construción dunha ponte de madeira sobre un regato.

Cofinanciación

O Obradoiro de Emprego comezou a súa andaina no mes de xullo do 2009 como un programa mixto de formación e emprego para formar profesionais maiores de 25 anos nas especialidades de carpintería, albanelería ou xardinería. Estivo cofinanciado polo Concello de Riveira, a Consellería de Traballo da Xunta de Galicia e o Fondo Social Europeo. Investíronse 678.000 euros, dos cales 548.000 euros foron aportados pola Xunta de Galicia e o Fondo Social Europeo e 130.000 polo propio Concello.  

No apartado de discursos, Andrés Hermida recalcou a idoneidade desta acción para que os maiores de 25 anos acaden unha preparación que lles permita incrementar as súas opcións de conseguir un emprego nestes tempos difíciles. 

Pola súa parte, o alcalde felicitou aos alumnos participantes e aproveitou a súa intervención para solicitar ante o director xeral a concesión dun novo obradoiro de emprego que dea remate as actuacións deseñadas co fin de dinamizar o parque.

Relacionadas:

Concedido o obradoiro "Illote Noro II", aquí

Composición do Illote Noro II, aquí

Restauración do lavadoiro de San Roque, aquí

Boiro, 4 de xuño de 2010.- O Goberno galego está a investir este ano na localidade de Boiro un total de 926.000 euros destinados a políticas de promoción do emprego e a accións formativas. Así o resaltou hoxe a conselleira de Traballo e Benestar, Beatriz Mato, quen visitou o obradoiro de emprego que está a piques de rematar. A iniciativa vense celebrando durante o ultimo ano e a súa finalización suporá dotar ao concello dun viveiro de empresas.

O departamento autonómico investiu neste obradoiro preto de 550.000 euros, no que se están a formar 28 alumnos en albanelería e carpintería. Mato destacou que as previsións son que ao menos 18 deles poidan insertarse no mercado laboral ao lembrar que as estadías indican que un 70 por cento dos participantes nos obradoiros de emprego conseguen un contrato de traballo.

Así, Mato salientou que “o Goberno galego segue a confiar na efectividade das políticas activas de emprego e máis que nunca nesta situación de crise” ao tempo que avogou “plenamente” polo fomento da empregabilidade como “unha auténtica vía para axudar aos traballadores en paro, ao contrario que os subsidios”. Engadiu que para a Administración autonómica esta iniciativa é unha “ferramenta básica” para a mellora da empregabilidade dos traballadores e traballadoras galegas. Argumentou que as accións mixtas de formación e emprego proporcionan un contrato de traballo, ofertan unha formación acorde coas necesidades do mercado laboral e fan visible o esforzo coa realización de obras de interese xeral para a comunidade. Explicou tamén que a planificación destas accións forman parte “esencial” do diálogo cos axentes sociais e tamén do Plan Autonómico de Emprego 2010-2013.