O gasto por ano da Casa de Galicia en Madrid é de 700.000 euros
Santiago, 3 de maio de 2012. O portavoz da Área institucional do Grupo Socialista, José Manuel Lage, presentou hoxe, en rolda de prensa, unha Proposición non Lei mediante a que se insta á Xunta a realizar, antes do 31 de xullo, “un chequeo xeral dos inmobles en propiedade que dispón o Goberno galego e os entes autonómicos para que sexa remitido ao Parlamento dando conta da relación, situación e o uso actual dos devanditos inmobles.”
Audio do exposto hoxe por Lage
A iniciativa de Lage Tuñas esixe tamén revisar os contratos de aluguer de locais que ten a Xunta asinados e que están destinados a situar departamentos e servizos da Administración autonómica, priorizando a reubicación de servizos en inmobles propiedade do Goberno autonómico ou doutras administracións públicas.
A Proposición non de Lei socialista insta tamén a abordar o peche das novas embaixadas da Xunta no exterior e buscar novas solucións para manter a presenza galega no exterior a partires da colaboración co Ministerio de Asuntos exteriores de España.
O deputado socialista xustifica a súa iniciativa no coñecemento de que a Xunta, en 2011 dispoñía unha contía superior aos 9,2 millóns de euros para sufragar os gastos derivados do aluguer de oficinas e inmobles dedicados a situar diferentes servizos da Administración autonómica. Este gasto elévase ata os 10 millóns de euros se lle engadimos os contratos derivados do que se coñece como “administración paralela”.
A maiores, engade o deputado socialista, o goberno de Feijóo gasta 6,4 millóns de euros nas súas oficinas no exterior, sen ter adoptado ningún acordo para o seu peche, a pesares dos criterios anunciados polo Goberno do Estado de reubicar estas “embaixadas” autonómicas para evitar gastos aos gobernos autonómicos.
Entre os inmobles alugados dentro da Comunidade Autónoma, salienta Lage Tuñas, que se están a pagar cantidades que non se corresponden coa realidade económica actual do país. Citou, como exemplo, os máis 4.100 €/mes de Galicia Calidade, ou os máis de 15.000€/mes de Portos de Galicia, ou o Instituto Galego de Consumo, que gasta máis de 14.000€/mes.
As embaixadas de Feijóo no exterior
O parlamentario socialista desglosou os case seis millóns e medio de euros en presenza exterior dividindo dous millóns en inmobles institucionais, dos que o Palacete da Casa de Galicia en Madrid supera os 700.000 euros de gasto, e os outro 4,5 millóns de euros corresponden ao acordo que a Xunta ten coa Confederación de Empresarios de Galicia, para ter “embaixadas abertas”.
“O país non se pode permitir redes de embaixadas gastando 4.000 €/mes en Xapón, outra sede do IGAPE en Polonia, que costa máis de 3.200€/mes da que non sabemos as xestións ou o que se fixo alí, ou unha oficina en Miami cun custe de 11.000 €/mes”. Tres espazos económicos diferentes, postos de exemplo polo deputado socialista, onde “a Xunta gasta cartos públicos todos os meses” sen que saibamos “o proveito para Galicia”.
Asistimos a unha serie de decisións "graves” que afectan aos servizos públicos, que se deterioran por mor dunha política de recortes que, desde logo, insiste Lage, “esqueceu facer un chequeo xeral do Patrimonio da Administración Autonómica”. “Óptase por recortar aos empregados públicos e alí onde máis se precisa, a Sanidade e a Educación, nos Servizos Sociais”, pero o Goberno Galego segue mantendo determinadas políticas que Galicia “non se pode permitir”, a xuízo dos socialistas.
“Non é posible que sigamos mantendo centos de locais en aluguer pagando contías que en algún caso son moi onerosas”, entende Lage que “hai que facer unha revisión”. Para o deputado “cando hai que apertarse o cinto, non se lle pode pedir sempre o esforzo aos mesmos”. Son 15 millóns de euros en alugueres, das sedes dentro da Comunidade, como na rede exterior. Lage esixe un “cambio de rumbo” na política de patrimonio para “evitar o gasto improdutivo e se mellore a eficiencia económica dentro da Administración galega”.
Nota da Xunta:
A Xunta aforra cada ano 1,6 millóns de euros en alugueiros ao rebaixar o seu custe máis dun 20% esta lexislatura
O Goberno galego conseguiu diminuír de 7,6 a 6 millóns de euros a partida anual co aproveitamento de inmobles propios e a renegociación á baixa de alugueiros
Existen alugueiros contratados polo anterior Goberno bipartito que non foi posible rescindir aínda porque teñen unha vixencia determinada e sería máis custoso resolvelos antes de tempo
Santiago, 3 de maio de 2012.- A Xunta de Galicia está a aforrar cada ano un total de 1,6 millóns de euros en alugueiros, ao conseguir rebaixar o seu custe global máis dun 20% no que vai de lexislatura en relación coa anterior. Desta maneira diminuíu a partida anual de 7,6 a 6 millóns de euros.
O Executivo autonómico conseguiu este aforro grazas á súa política de reestruturación de dependencias da Administración galega, eliminado alugueiros e aproveitando os inmobles propios e, cando isto non é posible, renegociando á baixa o custe dos mesmos; ademais de limitar ao máximo os novos contratos.
As actuacións levadas a cabo polo Goberno galego teñen como finalidade a aplicación do principio de austeridade do gasto público e proseguirán neste liña de racionalización e eficiencia durante toda a lexislatura.
Por outra banda, existen alugueiros que foron contratados polo anterior Goberno bipartito que non foi posible rescindir aínda porque teñen unha vixencia determinada. É o caso da oficina comercial en Miami, cun contrato de arrendamento de 4.725 euros ao mes realizado na anterior lexislatura e en vigor ata finais do ano 2013. A resolución deste contrato antes do seu vencemento e a firma dun novo suporía un gasto maior. Ademais, as oficinas que a Xunta tiña en Polonia e en Xapón pecháronse a comezos de 2011, polo que non se está a pagar nada en alugueiros nestes países.
A Xunta de Galicia busca unha maior eficiencia e rendibilidade, para o que traballa en coordinación co Goberno central, na posibilidade de compartir espazos comercias, sempre contando cos intereses e necesidades do tecido empresarial galego e tendo en conta a estratexia do Executivo autonómico para impulsar a internacionalización.
Alugueiros gravosos da época do bipartito
Outro caso, tamén asinado polo bipartito, concretamente en novembro de 2006, é o alugueiro da sede do Instituto Galego de Consumo (IGC), polo que supón un custe de 14.000 euros ao mes durante 15 anos. A indemnización para poder liberalo sería moi custosa para a Administración autonómica.
En canto ás dependencias de Galicia Calidade, o custe do local no que se localizaba durante a etapa do bipartito era de 3.500 euros ao mes; polo que o actual Goberno, a finais de 2010, buscou outro local, polo que paga un 40% menos, 2.100 euros, ademais de estar mellor equipado e ser máis amplo.
Respecto ás dependencias de Portos de Galicia, non só se está pagando un 23% menos que na lexislatura anterior, senón que esta diminución de custes é compatible con aumentar un 66% a superficie das instalacións ao servizo deste organismo.
Edificos públicos baleiros: e os dos partidos, tamén
Por suposto, ningún dos partidos implicados nesta lea dixo nada dos seus propios inmobles. Namentres en países avanzados de Europa os partidos non teñen oficinas de seu e empregan edificios de uso público para as súas reunións -non son tantas nin tan seguidas en cada lexislatura-, neste país tanto Psoe como PP teñen en propiedade cantidade de inmobles que están baleiros e sen aproveitar a maior parte do tempo. Nunha época na que os desafiuzamentos de familias enteiras medran exponencialmente pola mala xestión da burbulla inmobiliaria e dos desmáns dos bancos e caixas, tanto PP coma Psoe teñen pouco exemplo que darnos aos cidadáns, que nos sentimos insultados pola súa actitude de patio de recreo "e ti máis".
Comentarios [0]