- A directora xeral de Comercio e a xerente da Fundación Centro Galego da Artesanía e do Deseño participaron hoxe nas IV Xornadas de Construción Naval en Madeira “Un mar de madeira"
- A Asociación Galega de Carpintería de Ribeira, organizadora deste encontro, é unha das entidades beneficiarias da orde de axudas convocada pola Dirección Xeral de Comercio para o fomento do asociacionismo e do desenvolvemento do sector artesán galego, cun importe total de preto de 100.000 euros
Boiro, 15 de outubro de 2011.- A Consellería de Economía e Industria asegura que continúa "a aposta pola artesanía galega, neste caso por un dos oficios tradicionais que conta cunhas excelentes posibilidades de desenvolvemento como é a carpintería de ribeira", tal e como sinalou esta mañá a directora xeral de Comercio, Nava Castro Domínguez, durante o acto de inauguración da cuarta edición das xornadas “Un mar de madeira”.
Nava Castro lembrou que a Asociación Galega de Carpintería de Ribeira (Agalcari), organizadora deste encontro, é unha das entidades beneficiarias da orde de axudas convocadas pola Dirección Xeral de Comercio para o fomento do asociacionismo, da modernización e do desenvolvemento do sector artesán galego neste ano 2011, que contan cunha achega total de preto de 100.00 euros. Agalcari ten previsto destinar a súa axuda á divulgación e promoción da artesanía, así como á incorporación do deseño ás novas liñas de produto e outras actuacións específicas, como é o caso destas xornadas.
A Asociación Galega de Carpintería de Ribeira representa a todos os obradoiros e estaleiros que se dedican en Galicia á elaboración de embarcacións de madeira e, desde a súa creación no ano 2007, traballa co obxectivo de recuperar e de impulsar este oficio, así como de demostrar que a construción naval en madeira ofrece excelentes posibilidades que poden competir actualmente coa introdución de novos materiais e coas necesidades do mercado.
Neste sentido, Nava Castro salientou o apoio que se lle está a brindar desde o goberno galego a este tipo de iniciativas de recuperación e divulgación dos oficios artesanais galegos e destacou a relevancia das xornadas “Un mar de madeira” como foro de debate, reflexión e coñecemento sobre a cultura mariñeira e o patrimonio marítimo, así como unha plataforma de divulgación do oficio artesanal da carpintería de ribeira.
Entre o programa de actividades da cuarta edición destas xornadas destaca a presentación dun plan de actuación para a construción naval en madeira, denominado Proxecto Dorna e impulsado pola Consellería do Mar, e diferentes conferencias relacionadas co deseño das embarcacións, as vantaxes de empregar a madeira como material de construción, cuestións sobre a regulamentación da construción naval en madeira ou perspectivas de futuro do sector. Ao remate das xornadas, Agalcari fará entrega do II Premio “Fasquía”, en recoñecemento da traxectoria dos carpinteiros de ribeira.
Proxectos fallidos nunha política erráticaA Xunta leva nesta lexislatura varios proxectos para impulsar este sector, e todos fan auga. O máis escandaloso foi o da goleta que querían construír en San Cibrao (Mariña de Lugo) por case dous millóns de euros. En Galicia Confidencial pódese ler algo sobre o caso. Namentres, embarcacións históricas como o Hidria Segundo, non acadan unha cadela para manterse a flote, ou cústalles deus e axuda a asociacións particulares procurar financiación para restaurar balandros como o noiés Joaquín Vieta.
Clausura
A conselleira do Mar, Rosa Quintana, enxalzou a construción naval en madeira como “unha actividade de futuro”, que conxuga o saber, a tradición e os coñecementos técnicos precisos. A conselleira destacou os “pasos en firme” que se están a dar co sustento da tradición porque “estas xornadas son un feito importante para encadear de cara ao futuro o saber acumulado durante séculos”. Díxoo durante o acto de clausura das IV Xornadas de Contrución Naval en Madeira, organizadas pola Asociación Galega de Carpintería de Ribeira (Agalcari) que se celebraron hoxe en Boiro.
A titular de Mar destacou a actividade realizada por Agalcari que supón “a continuidade dun ronsel que vén marcado polo éxito e as experiencias”, precisou a conselleira. Do mesmo xeito, a titular do departamento marítimo fixo fincapé nas vantaxes do uso da madeira para a práctica mariñeira, tanto en termos de sostibilidade como de respecto ambiental.
Neste sentido, a conselleira puxo como exemplo o proxecto DORNA (Desenvolvemento Organizado e Sustentable de Recursos no Noroeste Atlántico), revisado recentemente e que fixa uns “alicerces sólidos para continuar coa actividade da carpintería de ribeira”, salientou. A maiores, a titular de Mar fixo fincapé na importancia de aproveitar os fondos xestionados e investidos polos Grupos de Acción Costeira, que entre outras cousas deben servir para impulsar proxectos no eido do patrimonio do mar de Galicia.
Finalmente, Rosa Quintana ofreceu o apoio da Consellería do Mar aos construtores navais en madeira de Galicia e desexoulles que o “rumbo sexa positivo” para “retomar o dinamismo da construción naval en madeira”, dixo a conselleira.
Agalcari
A Asociación Galega de Carpintería de Ribeira nace como un mecanismo para corrixir as eivas da construcción naval en madeira. Trátase dun colectivo que funciona como un organismo dinamizador para o aproveitamento dos recursos económicos para a creación de riqueza a través de novas construccións en madeira. Agalcari traballa co obxectivo de representar, defender e promocionar os intereses económicos, sociais, profesionais e culturais dos seus 20 estaleiros membros.
Máis información:
http://www.agalcari.es
Pode que estea relacionada:
Desguace forzoso: van despezar o Vianto III
Comentarios [0]